ဗီဇဆိုတာ မျိုးစေ့လို့အဓိပ္ပါယ်ရတယ်။ သရက်ပင်ဖြစ်လာတာ သရက်မျိုးစေ့ကြောင့် စပါးပင်ဖြစ်လာတာ စပါးမျိုးစေ့ကြောင့် မြေပဲပင်ဖြစ်လာတာ မြေပဲမျိုးစေ့ကြောင့်လို့ သဘောပေါက်ထားရင် မျိုးစေ့အရင်းအမြစ်ကို အရေးကြီးတယ်လို့ ထပ်ပြီးသဘောပေါက်ရမယ်။ ဒီလိုပဲ ငရဲ တိရစ္ဆာန် ပြိတ္တာ လူ နတ် ဗြဟ္ခာခန္ဓာတွေရဲ့ မျိုးစေ့တွေက ကမ္မဗီဇ ကံမျိုးစေ့တွေ၊ ကံမျိုးစေ့ကလဲ ကုသိုလ်ကံ မျိုးစေ့ အကုသိုလ်ကံမျိုးစေ့လို့ နှစ်မျိုးရှိတယ်။ လူဖြစ်ချင်ရင် လူမျိုးစေ့ကုသိုလ်ကံပြုရတယ်။ အကုသိုလ်ကံမျိုးစေ့တွေစိုက်ရင် အပါယ်ခန္ဓာတွေ ဖြစ်လာမှာပေါ့။ အခုရထားတဲ့ခန္ဓာဟာ အတိတ်ကံမျိုးစေ့ကြောင့်ဖြစ်လာရတာဖြစ်တယ်။ ယခုပစ္စုပ္ပန်ကံတွေကတော့ နောက်ထပ်ခန္ဓာတွေ နောက်ခန္ဓာမျိုးစေ့တွေအတွက် ကမ္မဗီဇဖြစ်ကြရတယ်။
နောက်တခုက ၀ါသနာအကျင့်၊ ၀ါသနာဆိုတာ ထပ်ကာထပ်ကာ ပြုတာ ပြောတာ ကြံစည်တာကိုခေါ်တယ်။ ၀ါသနာဆိုတာ ကိလေသာရဲ့သတ္တိအရှိန်တွေကိုလည်း ၀ါသနာလို့ခေါ်တယ်။ ၀ါသနာကိုဘုရားရှင်သာ ကိလေသာနှင့်တကွ ဖယ်တော်မူနိုင်တယ်။ အရှင်သာရိပုတ္တရာအစရှိတဲ့ ပုဂ္ဂိုလ်များက ၀ါသနာကိုပယ်တော်မမူနိုင်ကြဘူး။ လူငယ်တစ်ယောက်ဟာ ဆေးလိပ်သောက်ဝါသနာပါတယ်ဆိုပါစို့၊ မွေးကတည်းကဆေးလိပ်သောက် ၀ါသနာပါလာတာမဟုတ်ဘူး။ စသောက်တော့ တစ်ဖွာတစ်ရှိုက်ကနေ ထပ်ကာထပ်ကာ သောက်လာတော့ ၀ါသနာအကျင့်ဖြစ်လာပြီး ဖားဖိုဆွဲသလိုသောက်တတ်လာတယ်။ ဒီလိုတစ်ဖွာတစ်ရှိုက်စတာကလဲ မိဘတွေက ဆေးလိပ်မီးညှိခိုင်း၊ နည်းနည်းဖွာကြည့်တာကနေ ဖြစ်လာရတော့တာပဲ။ အရက်သောက်တဲ့ဝါသနာဟာလဲ တစ်ငုံ တစ်ခွက် တစ်ဖလားကနေ ပေပါကိုင်းတပ်တဲ့အဆင့်ထိရောက်လာရတာဟာ မိဘဆွေမျိုးပတ်ဝန်းကျင်က တွန်းပို့တာကြောင့်ပဲ။ လဖက်ရည်ဆိုင်ထိုင်တာလဲ ထို့အတူပဲ။ မိဘဆွေမျိုးပတ်ဝန်းကျင်အသိုင်းအ၀ိုင်းက တွန်းပို့တာကနေ လဘက်ရည်ဆိုင်တဲ့ဝါသနာ ဖြစ်ပေါ်လာတာပဲ။
နောက်ဆုံးတစ်ခုက စရိုက်၊ စရိုက်ကခြောက်မျိုး၊ အကုသိုလ်ကသုံးမျိုး ကုသိုလ်ကသုံးမျိုးရှိတယ်။ လောဘ ဒေါသ မောဟ အကုသိုလ်မကောင်းတဲ့ဒုစရိုက်တွေကို နည်းပါးသွားအောင်ကျင့်ရင်းနဲ့ သဒ္ဓါ ပညာ ၀ိတက်ဆိုတဲ့ ကောင်းတဲ့ကုသိုလ်သုစရိုက်တွေကို တဖြည်းဖြည်းတိုးပွားများပြားလာအောင် ဆောင်ရွက်ပေးရမယ်။ စရိုက်နှင့်ပတ်သက်လို့ ကမ္မဋ္ဌာန်းတရားတွေအားထုတ်မှ မကောင်းတဲ့စရိုက်တွေလျော့ပါးလာပြီး ကောင်းတဲ့သုစရိုက်တွေတိုးပွားများပြားလာမယ်။ ၀ါသနာနဲ့ပတ်သက်ပြီးတော့ မကောင်းတဲ့ဝါသနာ အကုသိုလ်ဝါသနာတွေအစား ကုသိုလ်ဝါသနာအလုပ်တွေဖြစ်ပေါ်လာအောင် အားပေးအားမြှောက်ဆောင်ရွက်စေရမယ်။ ဗီဇကတော့ ယခင်ကဘ၀ ကုသိုလ်မျိုးစေ့ဗီဇပါလာတဲ့အတွက်ကြောင့် ဗီဇကိုပြုပြင်လို့မရနိုင်ပါဘူး။ နောင်တမလွန်မှာ ဗီဇကောင်းဖို့ကိုသာ ကြိုးစားကြဖို့လိုပါတယ်။
ဆရာတော်ဆေကိန္ဒ၏ ဗီဇ ၀ါသနာ စရိုက် ကိုစီလျော်သလို ပြန်လည်ရေးသားဖော်ပြရခြင်းဖြစ်ပါသည်။
No comments:
Post a Comment